အိမ်အကူအား နှိပ်စက်ပြီး တိမ်းရှောင်နေသည့် မော်ဒယ်လ် လင်မယားကို ရဲတပ်ဖွဲ့ ဖမ်းမမိသေး

လက်တွင် အပူလောင် ဒဏ်ရာများရရှိထားသော နော်ထက်ထက်နှင့် သူ၏ မိခင် (ဓာတ်ပုံ – နန်းဆိုင်နွမ် / ဧရာဝတီ)

အသက် ၁၅ နှစ်အရွယ် အိမ်အကူ မိန်းကလေးငယ်ကို ညှဉ်းပန်းနှိပ်စက်မှုများ ပြုလုပ်ခဲ့သည့် ဗီဒီယို သရုပ်ဆောင် မော်ဒယ်လ် သီရိကိုကိုနိုင်နှင့် ခင်ပွန်းဖြစ်သူတို့သည် တရားရုံးက ဖမ်းဆီးမိန့်ဝရမ်း ထုတ်ပြန်ပြီးနောက် ယနေ့တိုင် တိမ်းရှောင်နေဆဲဖြစ်ကြောင်း သိရသည်။

ဧရာဝတီတိုင်း မြောင်းမြမြို့နယ်မှ အိမ်အကူအဖြစ် လာရောက်လုပ်ကိုင်နေသူ နော်ထက်ထက်ကို အိမ်ရှင် သီရိကိုကိုနိုင်နှင့် ခင်ပွန်းဖြစ် သူ ဦးကြည်လှမြင့်တို့က ညှဉ်းပန်းနှိပ်စက်မှုများ ပြုလုပ်ခဲ့သည်ဟု ဆိုသည်။

ထိုသို့ ညှဉ်းပန်းနှိပ်စက်မှုများ ပြုလုပ်သည့်အတွက် နော်ထက်ထက်၏မိခင် နော်မိချိုက တရားလိုပြုလုပ်၍ ပုသိမ်မြို့ အမှတ် ၂ ရဲစခန်း ၌ ယခုနှစ် မတ်လအတွင်းက အမှုဖွင့်တိုင်ကြားခဲ့ခြင်း ဖြစ်သည်။

ရန်ကုန်မြို့ ဗဟန်းမြို့နယ်ရဲစခန်းက အမှုကို လွှဲပြောင်းရယူပြီးနောက် တရားရုံးသို့ တင်ပို့၍ တရားစွဲဆိုခဲ့ပြီး ဗဟန်းမြို့နယ် ကမ္ဘာအေး ဘုရားလမ်း၊ ကိုယ့်မင်းကိုယ့်ချင်း ရပ်ကွက်၊ အိမ်အမှတ် – ၃၀ တွင်နေထိုင်သည့် သီရိကိုကိုနိုင်နှင့် ခင်ပွန်းဖြစ်သူ ဦးကြည်လှမြင့် တို့အား ဗဟန်းတရားရုံးက ယခုနှစ် ဇွန်လ ဒုတိယပတ်မှစတင်၍ ဖမ်းဆီးမိန့် ၀ရမ်း ထုတ်ပြန်ခဲ့သည်။

ဖမ်းဆီးမိန့် ၀ရမ်း ထုတ်ပြန်ပြီးနောက် သီရိကိုကိုနိုင်တို့ ဇနီးမောင်နှံသည် အဖမ်းမခံဘဲ ၂ လကျော်ကြာ ထွက်ပြေးတိမ်းရှောင်နေခြင်း ဖြစ်သည်ဟု ဗဟန်း ရဲစခန်းက ပြောသည်။

ယင်းအမှုအား အမှုစစ်အရာရှိအဖြစ် တာဝန်ယူခဲ့သည့် ဒုရဲအုပ် ထွန်းမွှေးက“သူတို့ကို ဒီနှစ် ၆ လပိုင်းထဲမှာ ဗဟန်းတရားရုံးက ဖမ်း ၀ရမ်း ထုတ်ထားတယ်။ တရားခံပြေး အနေနဲ့ပေါ့။ နှစ်ယောက်စလုံးက အိမ်ကိုတံခါးပိတ်ပြီး ထွက်ပြေး တိမ်းရှောင်နေတယ်လေ။ အဲဒီ ဖမ်းဝရမ်းကို ရဲစခန်းက အတည်ပြုဆောင်ရွက်ပြီး ဖမ်းမိနိုင်ရေးကြိုးပမ်းနေတယ်။ မိပြီဆိုရင် တရားရုံးကို ပြန်တင်ပေးရမယ်”ဟု ဧရာဝတီကို ပြောပြသည်။

သီရိကိုကိုနိုင်နှင့် ခင်ပွန်းဖြစ်သူတို့အား ဗဟန်းတရားရုံး၌ စွဲဆိုထားသည့် ပုဒ်မများမှာ ၃၂၃ (တုံးသောလက်နက်ဖြင့် သာမာန်နာကျင် စေမှု)၊ ၃၂၄ (ချွန်သောလက်နက်ဖြင့် သာမာန် နာကျင်စေမှု)၊ ၃၄၆/၁၁၄ (မတရား ဖမ်းဆီးချုပ်နှောင်မှု)နှင့် ၅၀၆/၁၁၄ (ခြိမ်းခြောက် မှု) တို့ ဖြစ်ကြောင်း သိရသည်။

ကရင်တိုင်းရင်းသူ နော်ထက်ထက်သည် ဧရာဝတီတိုင်း ဒေသကြီး မြောင်းမြ မြို့နယ် မဲကျော် ကျေးရွာအုပ်စု ၀ဲဒေါင့် ကျေးရွာတွင် နေထိုင်သူ ဖြစ်သည်ဟု ဆိုသည်။

နော်ထက်ထက် သည် ရန်ကုန်မြို့ရှိ သီရိကိုကိုနိုင်၏ နေအိမ်သို့ ၂၀၁၃ ခုနှစ် ဒီဇင်ဘာလက စတင်ရောက်ရှိပြီး အိမ်အကူ အဖြစ် တလလျှင် လုပ်အားခငွေ ကျပ် ၂၅၀၀၀ နှုန်းဖြင့် လုပ်ကိုင်ခဲ့သူ ဖြစ်ကြောင်း သိရသည်။

အိမ်အကူ သက်တမ်း ၂ လကျော် ကြာမြင့်ချိန် ယခုနှစ် မတ်လအတွင်း၌ သီရိကိုကိုနိုင်နှင့် ခင်ပွန်းဖြစ်သူတို့က ခေါင်းကွဲသည်အထိ တံမြက်စည်းဖြင့် ရိုက်ခြင်း၊ လက်သီးဖြင့် ထိုးခြင်း၊ ပလာယာ၊ ကပ်ကြေးများဖြင့် ထိုးနှက်ခြင်း၊ ထမင်း မကျွေးဘဲ အခန်းအတွင်း၌ ပိတ်လှောင်ထားခြင်းနှင့် ဆီပူအိုးထဲသို့ လက်နှစ်၍ နှိပ်စက်ခြင်းများ ပြုလုပ်ခံခဲ့ရသည်ဟု နော်ထက်ထက်က ပြောသည်။

ထို့နောက် နော်ထက်ထက်၏ ဒဏ်ရာများကို ရန်ကုန်၌ ဆေးကုမပေးဘဲ သီရိကိုကိုနိုင်နှင့် ခင်ပွန်းဖြစ်သူတို့က ပုသိမ်မြို့ရှိ သီရိကိုကိုနိုင် ၏ ဖခင် ဧရာဝတီတိုင်း ဒေသကြီး ဆိပ်ကမ်းအာဏာပိုင် အရာရှိ ဦးကိုကိုနိုင် နေအိမ်သို့ ပို့ဆောင်ခဲ့ကြသည်။

အပူလောင် ဒဏ်ရာ၊ ဖူးယောင်ညိုမည်း ဒဏ်ရာ၊ ပွန်းပဲ့ပြတ်ရှ ဒဏ်ရာများဖြင့် ရောက်ရှိလာသည့် နော်ထက်ထက်အား ဆိပ်ကမ်း အာဏာပိုင် အရာရှိ ဦးကိုကိုနိုင်က ပုသိမ်မြို့ရှိ “လမင်း” အထူးကု ဆေးခန်းတွင် ဆေးကုသပေးခဲ့ရာ ၎င်းဆေးခန်းက ရဲမှုခင်း ဖြစ် နေသည့် အတွက် လက်မခံသောကြောင့် ပုသိမ် အထွေထွေရောဂါကု ဆေးရုံကြီးသို့ တင်ပို့ ကုသပေးခဲ့ခြင်း ဖြစ်ကြောင်း သိရ သည်။

ပုသိမ်မြို့ ပြည်သူ့ဆေးရုံကြီး၌ ဆေးကုမှုခံနေသော ကရင်တိုင်းရင်းသူ နော်ထက်ထက်၏ သတင်းကို ပုသိမ်ရှိ ကရင်နှစ်ခြင်း ခရစ်ယာန် သာသနာမှ အမျိုးသမီးရေးရာ အဖွဲ့က ကြားသိပြီးနောက် ဆေးရုံ၌ လိုက်လံစုံစမ်းရာမှ မိန်းကလေးငယ်၏ အမှုကို ဖော် ထုတ်နိုင်ပြီး မိဘများကိုလည်း အကြောင်းကြား ပေးနိုင်ခဲ့ခြင်း ဖြစ်သည်။

“ကလေးက အခုချိန်အထိ စိတ်ဒဏ်ရာရနေတယ်။ စိုးရိမ်ထိတ်လန့်တာတွေ အားငယ်တာတွေ ရှိနေတုန်းပဲ။ လူသားမဆန်စွာ ညှဉ်း ပန်း နှိပ်စက်ခဲ့သူတွေကို တာဝန်ရှိသူတွေအနေနဲ့ ဖမ်းဆီးပြီး ဥပဒေအရ အပြစ်ပေး အရေးယူနိုင်အောင် ၀ိုင်းဝန်း ကူညီပေးစေချင်ပါ တယ်”ဟု ကရင်နှစ်ခြင်း ခရစ်ယာန် သာသနာအဖွဲ့မှ အမျိုးသမီးရေးရာ တာဝန်ခံ နော်စိန်ချစ်က ပြောသည်။

လက်ရှိတွင် နော်ထက်ထက်ကို ရန်ကုန်မြို့ လှိုင်သာယာမြို့နယ်တွင် ဖွင့်လှစ်ထားသည့် မြန်မာနိုင်ငံ ခရစ်ယာန် ဂိုဏ်းပေါင်းစုံ သာသနာ အဖွဲ့ (MCC) က ထိန်းသိမ်း စောင့်ရှောက်ထားပြီး မိန်းကလေးငယ်၏လက်မှ ဆီပူလောင် ဒဏ်ရာကို ၅ ကြိမ်မြောက် ခွဲစိတ် ကုသပေးရန် စီစဉ်နေကြောင်း သိရသည်။

“သူ့လက်က မီးလောင်ထားတဲ့ ဒဏ်ရာက ဆရာဝန်နဲ့ပြတာတော့ ပြန်ခွဲစိတ်ရမယ် ပြောတယ်။ ညာဘက်လက်က လုံးဝကို ဘာမှ မလုပ်နိုင်ဘူး ဖြစ်နေတာလေ။ ခွဲစိတ်ခကတော့ ၁၀ သိန်းလောက်ကုန်မယ်ဆိုတော့ ငွေမလောက်လို့ အလှူရှင်ရှာနေတယ်။ လက် ကဒဏ်ရာပြီးရင် သူ့တကိုယ်လုံးကို ပြန်စစ်ဆေးတာတွေ လုပ်ရဦးမယ်။ ဘာလို့ဆိုတော့ အခုတောင် နဖူးက အရိုက်ခံထားရတဲ့ ဒဏ်ရာက ယောင်နေတယ်။ အတွင်းထဲမှာ ဒဏ်ဖြစ်နေတာပေါ့နော်”ဟု MCC ဌာန တာဝန်ခံ ဒေါ်မေလျံက ပြောပြသည်။

တာဝန်ရှိသူများအနေဖြင့် လူမဆန်စွာ ညှဉ်းပန်းနှိပ်စက်ခဲ့သည့် မော်ဒယ်လ် သီရိကိုကိုနိုင်နှင့် ခင်ပွန်းဖြစ်သူတို့ကို အမြန်ဆုံး ဖမ်းဆီးပြီး ဥပဒေ အရ အရေးယူဆောင်ရွက်နိုင်ရေး ကြိုးပမ်းရန် အိမ်အကူ မိန်းကလေးငယ်ကို ကူညီပေးနေသူများက ပြောဆိုကြသည်။

http://burma.irrawaddy.org/news/2014/09/09/64385.html

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.